Qırımnı Ukraina nezareti altına qaytaruv meselesi arbiy degil de, siyasiy yollarnen çezilmeli.
Bu kibi fikirni «Qırım» arbiy bölüginiñ komandanı Stanislav Krasnov SK efirinde bildirdi.
«Ümüt etem ki, bu meseleniñ siyasiy çezilüvi bar. Qırımda arbiy areketlerniñ olmasına yol bermemek kerek» – dedi o.
Krasnovnıñ fikrine köre, ukrain akimiyeti bugün Qırım işğaline olduqça sakin şekilde davrana.
«Akimiyet Qırım işğaline ğayet sakin şekilde davrana. Ukraina tarafından iç bir şey yapılmay. Al-azırda Ukraina devletiniñ siyaseti Qırım Rusiye Federatsiyasınıñ terkibinde olmasına yönetilgen. Misal içün, Qırımnıñ işğali olğan vaqıtta, biz ukrain akimiyetiniñ cinaiy faaliyetsizligini köre bile edik. Ne militsiya, ne SBU, ne orduğa emir berilmegen edi. O vaqıt er şeyni toqtatmaq mümkün edi. «Yeşil insanlar» yapqanlarından özleri qorqa edi. Olar reaktsiyağa baqa ediler, onıñ olmağanı sebebinden akimiyetni qolaylıqnen ellerine keçirdiler», – dedi Krasnov.
2014 senesi fevral soñunda mart başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
