Belli ukrain yırcısı, qırımlı Camala dekabr 12 künü StereoPlaza kiyev kontsert salonında öz şahsiy kontserti ile çıqışta bulundı. Zalda bulunğan seyircilerniñ çoqusı işğal etilgen Qırım ve Donbasstan köçip kelgenler edi. Olar kontsertke Krım-SOS cemaat teşebbüsinden elde etken bedava davet biletleri boyunca keldiler, dep haber ete Qırım.Aqiqat mühbiri.
«Bilesiñizmi, biz siznen şimdi ğayet ağır zamannı yaşamaqtamız. Çoqusımız içün bu qıyın bir sınavdır. Amma, teessüf ki, yaşağan zamanımıznı saylap olamaymız, elimizden kelgen eñ esası – onı lâyıq şekilde yaşamaq… Bizler içün tamırlarımıznı bilmek, olarnı unutmamaq ve halqımıznı sevmek – eñ müim şeylerdir. Vatannı unutmamaq, baba evini unutmamaq, yırlarımıznı unutmamaq. Halqımız atta eñ deşetli facialarda tekrarlanmaz yırlarnı yazğan edi», – dep ayttı sanadan aslı qırımtatar yırcısı Camala.
Krım-SOS yolbaşçısı Tamila Taşeva aytqanı kibi, zalda Camala öz kontsertine davet etken biñden ziyade insan buluna edi.
«Bu kibi qıyın vaqıtta muzıkanı diñlemek pek müim bir şeydirdir. Muzıka tedaviyley, belli olğanı kibi. Camalanıñ muzıkası – köçip kelgenlerge tebessüm bağışlağan bir melemdir. Diger yırcılarnı da bu kibi aktsiyalarnı ötkermege, Qırım ve şarqta evlerini taşlap, memleketniñ diger regionlarına köçip kelmege mecbur olğanlarğa yardım etmege çağıram», – dedi Tamila Taşeva Qırım.Aqiqat mühbirine.
Camalanıñ kontsertinde yırcınıñ beş yıllıq icadınıñ eñ güzel yırları yanğıradı. 2009 senesi ğalebe qazanğan «Yañı dalğa» kontsertinde olğan çıqışlarından başlap, yaqında çıqqan «Sağ ol» albominden yırları yanğırağan edi. Camala ukrain, qırımtatar, ingliz tillerinde yırlarnı icra etti.
Yırcınıñ çıqışından evel StereoPlaza sanasında işğal etilgen Qırımdan kelgen daa bir çalğıcı oynadı. Keriçte doğğan bestekâr, ukrain di-ceyi, – Nikolay Makeyev, Dj Expert kibi bellidir.
«Zalda farqlı yaşta olğan insanlar buluna edi. Esli başlı insanlarnı kördim, küçük balalar da edi. Az-buçuq vaqıt keçkeninen Camalanıñ muzıkası zalnı birleştirdi: biñlerce insan, problemlerini unutıp, oynadı, yırladı, küldiler. Aqiqaten ulu bir yırcı. Öz istidatı ile insanlarğa acı ve dertlerni unutmağa imkân bergen yırcıdır», – dep paylaşalar duyğuları ile Qırımdan köçip kelgen Yelena ve Vâçeslav.
Camala – aslı qırımtatar ukrain yırcısı, muzıkası caz, soul, elektron ve halq muzıkasını qaplap ala. Yaqında Camala ukrain rejissörı Oles Saninniñ «Povodır» filminde baş qadın rolüni icra etti.
