Link açıqlığı

Rusiye vatandaşlığını qabul etken Qırım sakinlerini arbiy cedvelge aluv esnası dekabr 20-de yekünlenmeli, dep tenbiyeley Aqmescitniñ Qırım arbiy komissarlığı.

Bu aqqında malümat Aqmescit şeer şurasınıñ saytında yerleştirildi.

«Arbiy cedvelge kirsetilecek er keske kelip, cedvelge adını yazdırmağa rica etemiz. Diqqatıñıznı celp etemiz: 2014 senesi dekabr 20 kününe qadar arbiy cedvelge adını yazdırmağan insanlar 2015 senesi yanvar 1-den itibaren qanunğa köre memuriy mesiliyetke çekilip, para cezasını alacaqlar», – aytıla beyanatta.

Qırımtatar halqınıñ lideri Mustafa Cemilev bildirdi ki, işğal etilgen Qırımda qırımtatarlarnı arbiy cedvelge yazdıralar, yanvar 1-den itibaren ise Rusiye Federatsiyası ordusına askerlikke çağırıp başlaycaqlar.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.

XS
SM
MD
LG