Türkiyeniñ Bursa şeerinde qırımtatatlarnıñ milliy lideri Mustafa Cemilevniñ şerefine yaptırılğan park açıldı. Cemilev de bu tedbirde iştirak etti.
Bunı Ukraina prezidentiniñ qırımtatar halqı işlerinden vekâletlisi Mustafa Cemilevniñ matbuat hızmeti bildire.
Qırımtatar halqı lideriniñ Türkiye ziyareti çerçivesinde oña Bursa şeerindeki Uludağ Universitetiniñ fahriy doktor unvanı berildi.
Ukraina prezidentiniñ vekâletlisi çıqışta bulunır eken, sovet sistemasınıñ repressiv siyaseti oña aliy oquv yurtını bitirmege bile imkân bermegenini aytıp, studentlik yıllarını sibir iş lagerinde keçirgenini bildirdi.
«Bu unvan bizim içün büyük bir şeref ve küçlü bir maneviy destek ola. Bizler küreştik, yıllardır bizler Vatanğa qaytmaq içün küreştik. Lâkin şimdi Putin (Rusiye prezidenti – muar.) qırımtatarlarnıñ liderlerine Qırımğa kirmege yasaq etti. On biñlernen semetdeşimiz evlerini terk etmege mecbur qaldı. Yanımızda seksen millionlıq Türkiye bar. Ümütlerimiz pek büyüktir. Bugünki tedbir işğalcilerge qarşı büyük bir maneviy destek köstere», – dedi Cemilev.
Mayıs ayında On sekiz Mart Çanakkale universitetiniñ Senatı Mustafa Cemilevge halqara munasebetler saasında «Fahriy doktor» unvanını bermege qarar bergen edi.
