Qırımtatarlarnıñ milliy lideri Mustafa Cemilev Rusiye prezidenti Vladimir Putinniñ Qırım Rusiye içün «muqaddes bir yer» olğanı aqqında sözlerini «primitivizm» dep adladı.
Bunı o eston «Radio 4» intervyüsında ayttı.
«Anda Knâz Vladimir çoqunğan eken, amma o Knâz Vladimir Kiyevskiy edi. Bizim toprağımızda birisi bir vaqıtları vaftiz olğan olsa ya da başqa bir şey yapqan olğan olsa ve bunıñ esasında... O vaqıt Moskva da qırımtatarlar içün muqaddes bir yer – Devlet Geray Moskvanı zapt etip, anda başqalarğa örnek olsun dep, kendi qamçını asqan edi. Lâkin bizler Moskva bizim muqaddes yerimiz dep, onı almayıq da», – dedi Cemilev.
«Bir söznen aytacaq olsaq, Rusiye siyasetinde küçlü bir primitivizm körüne. Lâkin bu yalıñız iç qullanuv içün, çetelde oña küleler», – dedi qırımtatarlarnıñ milliy lideri.
Rusiye prezidenti Vladimir Putin dekabr 4-de Federal keñeş muracaatında Qırım Rusiye içün «büyük medeniyet ve muqaddes emiyet» taşığanını ayttı.
