Rusiyede yasaq etilgen «Hizb ut-Tahrir» teşkilâtı Qırımdaki tarafdarlarına tesir etmege devam ete, yarımadada «tışqı» ve islâm faktorından sebep etnik zıddiyet quvetleşmesi red etilmey.
Böyle bir malümat cuma künü MİA «Rossiya segodnâ» agentliginde taqdim etilgen İnsan aqları Moskva bürosınıñ Qırım vaziyeti boyunca maruzasında aytıla, dep haber ete RİA Novosti.
«Qırımda Qara deñiz havzasında vekilleri olğan halqara ağ strukturalarınıñ qol tutuvı ile tışqı ve islâm faktorı olğanından sebep Qırımda etnik zıddiyet ilerilemesini red etmemek kerek», – aytıla maruzada.
Moskva ekspertleriniñ fikirince, bunı soñki yıllar devamında Qırımda «Bratya musulmane» ve «Hizb ut-Tahrir» areketleriniñ faaliyet inkişafı tasdıqlay.
Qırım işğalinden soñ «Hizb ut-Tahrir» islâm firqasınıñ Qırım teşkilâtı Rusiye yasağına baqmadan yarımadada işini devam etecegini bildirdi.
Firqa Ukrainada qayd etilmegen, lâkin din cemiyetleri üzerinden faaliyet köstergen edi.
Qırım «prokurorı» Natalya Poklonskaya Rusiyede yasaq etilgen din teşkilâtları, şu cümleden «Hizb ut-Tahrir» teşkilâtınıñ qayd etüv meselelerine ayrı diqqat ayırmağa çağırdı.
