Avropa komissiyası işğal etilgen Qırımğa qarşı yatırım, ticaret ve hızmetler saasında qoşma sıñırlavlarnı kirsetmege teklif etti. Bunı dekabr 12 künü Avropa birliginiñ tış siyasiy hızmetinde TASS qaynaqları bildirdi.
Belli olğanı kibi, bu sıñırlavlar Qırım işğaliniñ tanımağanı boyunca Avropa Birligi Strategiyasınıñ bir qısmı olacaqtır ve Rusiyege qarşı sanktsiyalarğa kirmey, çünki Avropa birligi Qırımnı Rusiyeniñ qısmı olaraq tanımay.
«Avropa komissiyası Qırımğa nisbeten yatırım, ticaret ve hızmetler saasında qoşma cezalav paketini işlep çıqardı. Onıñ em umumiy ve sektoral hususiyetleri ola bilir», – dey qaynaq.
Onıñ sözlerine köre, bu mesele dekabr 15 künü Avropa birliginiñ çetel işler nazirlik başlarınıñ Brüsselde olacaq körüşüvi devamına muzakere etilecek.
2014 senesi fevral soñunda mart başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
