Rusiye baş naziri Dmitriy Medvedev işğal etilgen Qırımda bağ hızmetlerniñ hususiyetleri aqqında ükümet avalesini imzaladı, – haber ete dekabr 12 künü TASS.
«Qırım Cumhuriyeti ve Aqyarda bağ hızmetleri saasında Rusiye qanunlarını qullanuv hususiyetleri aqqında» avale «icraiy akimiyet federal organları ile zaruriy işbirlikni alıp barğan» operatorlarğa 2017 senesi yanvar 1-ne qadar tesir etecek.
«Operatorlar 2015 senesi yanvar 1-ne qadar Roskomnadzorğa faaliyetleri, şu cümleden ağnıñ tehnikiy imkânları, kösterilgen hızmetleri ve müşterilerniñ sayısı aqqında malümatnı berseler, 2015 senesi mayıs 1-ne qadar çalışa bilecekler. Muracaatqa bağ operatorları Rusiye qanunlarına köre işleycegi aqqında ariza da qoşulmalı», – denile beyanatta.
Avalege köre, operatorlar Roskomnadzorğa bağ hızmetlerniñ berüvine litsenziyanı elde etmek içün 2015 senesi mart 1-ne qadar, radiosıqlıqlarnıñ qullanuvına musaadeni almaq içün – 2015 senesi mayıs 1 kününe qadar muracaat ete bile.
2014 senesi fevral soñunda mart başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
