Link açıqlığı

Rusiye tarafından işğal etilgen Qırımda deñiz yalısında qanunsız sürette alınğan mülkniñ «devletleştirüvi» ola bile. Bu aqta Qırımda «Qabarcılıqqa qarşı komitet»niñ reisi Aleksandr Akşantin bildirdi, – dep haber ete dekabr 12 kunü Çernomorskiye novosti.

Onıñ sözlerine köre, şahsiy mülkiyette olğan deñiz yalısındaki şifahaneler ve kottecler devletleştirile bile.

«Vaqıt keçkeninen er şey milliyleştirilir. Qırım Devlet Şurasında bir sıra obyektlerniñ cedveli qabul etildi. O ğayet keñiştir»,– dedi Akşantin.

O, ileride deñiz yalısında topraqnıñ qanunsız berüv imkâniyetiniñ ola bilecegini red ete.

«Rusiye Qanunlarında bu kibi şey aslında yoq. Bundan da ğayrı, Qırım başı bu meselelerni şahsiy nezareti altında tuta. Şunıñ içün bu imkânnı red etem», – dedi o.

Evel «Devlet şurası» birinci oquvda Ukraina mülküniñ Qırım mülkiyetine keçmesini qanunlar seviyesinde belgilegen «qanun leyhası»nı qabul etti.

Ayna zamanda «Yabloko» firqası Qırımda mülkniñ devletleştirüvini mümkün olmağan bir şey olaraq tanıy.

«Yağmacılıqnı qanunlaştırğan qarar lâğu etilmeli ve tutıp alınğan mülkiyet saiplerine qaytarılmalı», – denile firqanıñ beyanatında

2014 senesi fevral soñunda mart başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar

XS
SM
MD
LG