Cumaaqşamı künü, dekabr 11-de, İndistanda Qırımnıñ öz başına tayin etilgen «başı» tarafından imzalanılğan añlaşmalar resmiy degil. Bu aqta Ukraina çetel işler nazirliginiñ temsilcisi Yevgen Perebiynis bildirdi, – haber ete Azatlıq Radiosı.
«İnd iş adamlarınıñ biri ile añlaşma Aksönov tarafından Delide yerleşken Rusiye elçihanesinde imzalanıldı, şunıñ içün onıñ resmiy emiyeti yoqtır», – dedi o İnterfaks-Ukraina agentligine.
Belli olğanı kibi, Amerika Qoşma Ştatları Qırımnıñ öz başına tayin etilgen baş naziri Sergey Aksönovnıñ İndistan ziyareti sebebinden qasevet çeke. Bunı AQŞ Devlet Departamenti matbuat hızmetiniñ yolbaşçısı Jen Psaki bildirdi. Onıñ sözlerine köre, AQŞ İndistanda bulunğan Rusiye eyyeti arasında «Aksönovnıñ ola bilecegi» aqqında «bildirüvler sebebinden qasevet çeke».
Evel aytılğanı kibi, Qırımnıñ öz başına tayin etilgen baş naziri Sergey Aksönov dekabr 11 künü Rusiye Federatsiyasınıñ prezidenti Vladimir Putinniñ İndistan ziyaretinde iştirak ete.
