Yaqın zamanda ind iş adamlarnıñ taqımı işğal etilgen Qırımnı ziyaret etecek – bu netice Qırımnıñ öz başına tayin etilgen baş naziri Sergey Aksönovnıñ İndistan iş adamları ile körüşüvinden soñ peyda oldı. Bu aqta Qırımnıñ «baş nazir muavini», Qırımnıñ Rusiye prezidenti yanında daimiy temsilcisi Georgiy Muradov bilidirdi, – haber ete TASS.
«Qırımda İndistan ticaretine büyük meraq, yatırım leyhalarnıñ amelge keçirilmesine azırlıq bar. Şunıñ içün Qırımğa iş adamlarnıñ kelecegi aqqında añlaşma bar»,– dedi o.
Bundan da ğayrı, Muradov aytqanı kibi, Qırımğa yaqın zamanları ind jurnalistleri de kelecektir.
«İndistannıñ eñ büyük matbuat vastalarınıñ temsilcileri olacaq, bir qaç insan. Olar indistanlılarğa Qırım aqqında tarif etecekler», – dedi o.
Evel aytılğanı kibi, Qırımnıñ öz başına tayin etilgen baş naziri Sergey Aksönov dekabr 11 künü Rusiye Federatsiyasınıñ prezidenti Vladimir Putinniñ İndistan ziyaretinde iştirak ete.
Aksönovnıñ ziyareti çerçivsinde Qırım ve «İndistan-Qırım ortaqlığı» arasında işbirlik aqqında Memorandum imzalanıldı.
Belli olğanı kibi, Amerika Qoşma Ştatları Qırımnıñ öz başına tayin etilgen baş naziri Sergey Aksönovnıñ İndistan ziyareti sebebinden qasevet çeke. Bunı AQŞ Devlet Departamenti matbuat hızmetiniñ yolbaşçısı Jen Psaki bildirdi. Onıñ sözlerine köre, AQŞ İndistanda bulunğan Rusiye eyyeti arasında «Aksönovnıñ ola bilecegi» aqqında «bildirüvler sebebinden qasevet çeke».
