İşğal etilgen Qırımda aliy tasil sistemasını deñiştirip, mütehassıslarnı iş adamlarınıñ sımarışlarına köre azırlaycaq olalar, – dep haber ete Krıminform.
Bu aqqında Vernadskiy adına Tavriya milliy universitetiniñ iqtisadiyat fakultetiniñ dekanı Svetlana Tsöhla dekabr 11-de Aqmescitte olıp keçken «Küçük ve büyük biznes – Qırım iqtisadiyat inkişafınıñ temeli» ilmiy-ameliy konferentsiyasında bildirdi.
«Bizler aliy tasil saasında büyük farqlar körip, yañılıqlarğa alışamız», – dep qayd etti dekan.
Onıñ bildirgenine köre, evelden mezunlar universal olsa, şimdi tasil programmaları unikal olmalarına yönelgen.
«İleride belli bir yerde ve belli bir zenaat vazifelerini eda etip olacaq mütehassıslarnı azırlamağa isteymiz», – dedi Tsöhla.
Onıñ aytqanına köre, tasil programmaları iş adamlarınen añlaşıp tasdıqlanacaq. İş adamları belli bir mütehassısnıñ yapa bilecek işinen bağlı isteklerini bildirecekler.
