Yuqarı Rada Ukraina ükümetiniñ areketler programmasına qoltuttı. Buña 269 halq deputatı rey berdi, 28 kişi qarşı çıqtı, dep haber ete Azatlıq Radiosı.
Ukraina baş naziri Arseniy Yatsenük Yuqarı Radada ükümet areketleriniñ programmasını taqdim etken edi.
Halq deputatları Nazirler şurasınıñ programmasını tenqid ettiler. «Samopomiç» fraktsiyasınıñ reberi Oleg Berezük vesiqa tüzetilse, fraktsiya oña qoltutacağını ayttı.
«Petro Poroşenkonıñ Bloku» firqasınıñ fraktsiya yolbaşçısı Yuriy Lutsenko bildirdi ki, ükümet areketleriniñ programması mükemmel degil.
Parlament programmanı muzakere etken soñ Yuqarı Rada spikeri Vladimir Groysman teneffüsni ilân etti. Bundan soñra deputatlar ükümet areketleriniñ programmasına qoltuttılar.
