Link açıqlığı

Qırımda natsizm qurbanlarını añdılar


Dekabr 11-de işğal etilgen Qırımda Aqmescitteki Kefe yolunıñ 10-uncı kilometrinde qırımçaq ve yeudiylerni qurşunğa tizüvniñ yıllığı munasebetinen matem tedbirleri keçirildi.

Qırım.Aqiqat saytınıñ mühbiri bildire ki, tedbir Gitler ordularınıñ Qırım işğali vaqtında biñlerce öldürülgen ve kömülgen yeudiyler çuqurı yerinde tiklenilgen abide yanında olıp keçti.

Toplaşqanlar ögünde ortodoks, yeudilik ve islâm dininiñ vekilleri çıqışta bulundılar, dua oquldı.

Qırımçaqlar cemiyetiniñ temsilcisi UNESCO tarafından ğayıp olayatqan tiller sırasına kirsetilgen qırımçaq tilinde dua oqudı.

Tedbirde bulunğan resmiy şahıslar arasında Qırım ükümetiniñ «baş nazir muavini» Nikolay Yanaki, deputat Yefim Fiks ve İsrailniñ Aqmescitteki vekâletli konsulı Yan Epşteyn bar ediler.

Qırımçaq şairesi Nina Bakşi elâk olğanlarnıñ hatırasına şiirler oqudı. Yeuydilerniñ ananelerine köre abidege taşlar qoyuldı. Mitingde tahminen yüz kişi iştirak etti.

Tarihiy malümatlarğa binaen, 1941 senesi dekabr 11-13 künleri yeudiy ve qırımçaqlarnı Aqmescit civarında qurşunğa tizip, çuqurğa kömdiler. Qurbanlarnıñ sayısı 13 biñden 17 biñge qadar teşkil etti.

XS
SM
MD
LG