Link açıqlığı

Saatnıñ esas haberi

Qırımda «Ermeni Bazar işi» boyunca yaqalanğan Qurultay Merkeziy saylav komissiyası reisiniñ qardaşı azat etildi


Mayıs 3-te Mustafa Cemilevni qarşılağanda politsiya hadimine yapılğa ücümde qabaatlanıp yaqalanğan qırımlı Tair Smedlâyev azat etildi.

Bunı Tair Smedlâyevniñ adliyecisi Emil Kürbedinov Qırım.Aqiqat saytına bildirdi.

Hatırlatamız, Qırımtatar milliy Qurultayınıñ Merkeziy saylav komissiya reisi Zair Smedlâyevniñ qardaşı olğan Tair Smedlâyev oktâbr 22 künü Eski Qırımda yaqalanıldı. Onı Rusiye Federatstsiyası Cinaiy kodeksiniñ 318-inci maddesine köre («Akimiyet vekiline yapılğan zorbalıq areketleri») qabaatladılar. Aqmescitniñ Kiyev rayon mahkemesi Tair Smedlâyevniñ cezasını belgilep, onı bu seneniñ dekabr 22-ne qadar apiste tutmağa qarar aldı. Onı Aqmescit SİZOsında tuttılar.

«Tair Smedlâyevniñ cezası deñişti – mesülietni başqası aldı. Bunı Rusiye prezidentiniñ Qırımdaki vekâletli vekiliniñ (Oleg Belaventsevniñ – muar.) mesleatçısı Eskender Bilâlov istedi», – dedi Kürbedinov.

Adliyeciniñ aytqanına köre, İnsan aqları boyunca kontakt gruppası onıñ cezasını deñiştirmege teşebbüs köstergen edi. «Kontakt gruppasınıñ azaları olaraq bizler Sergey Aksönov ile ötkerilgen körüşüvlerimizden birinde onıñ cezasını deñiştirmege teklif ettik. Bizler onı SİZOda tutmaq acet olmağanını bir qaç kere aytıp, o, azatlıqta bulunıp, qanunlarnı bozmaycaq ve taqiqatçı ve mahkemege kelecegini ayttıq. O, uquq qoruyıcı organlarnıñ hadimine qarşı küç qullanmadı. Eskender ağa bizge qoltuttı», – dep ayttı Kürbedinov.

Onıñ bildirgenine köre, Tair Smedlâyevniñ cezasını deñiştirüv qararını «Ermeni Bazar işi» boyunca taqiqatçı çıqardı. Cumaaqşamı künü, dekabr 11-de, Qurultay MSK reisiniñ qardaşı azat etildi.

Kürbedinov mahkemeden aldın taqiqat ne zaman bitecegini aytıp olamadı. «İş 12-13 tomdan ibaret, onıñ taqiqatı ne vaqıt bitecek belli degil», – dedi o.

Kürbedinovnıñ aytqanına köre, aynı iş boyunca yaqalanğan Musa Apkerimov, Rustam Abdurahmanov ve Edem Ebulisov alâ SİZOda bulunalar.

XS
SM
MD
LG