İşğal etilgen Qırım dekabr 12 künü ilk sefer resmiy şekilde Rusiye Federatsiyasınıñ Anayasa Kününi qayd etесеk, dep haber ete Qırım.Aqiqat mühbiri.
Bu munasebet ile Qırım «parlamenti»nde cumaaqşamı künü, Rusiye bayramı arfesinde, tantanalı cumhuriyet toplaşuvı keçe, mında hor Rusiye ve Qırım gimnini icra etti. Zal ayaqqa turıp diñledi.
«Rusiye Anayasa Kününi 21-nci kere qayd etecek, cumhuriyetimizde – Rusiye Federatsiyasınıñ teñ uquqlı subyektinde ise bu kün ilk sefer devlet seviyesinde qayd etile», – dedi toplaşuvda Qırım «spiker»i Vladimir Konstantinov.
Qırımlılarnıñ adından Rusiye prezidenti Vladimir Putinge, Federatsiya Şurası ve Devlet dumasına yarımadanıñ Rusiye terkibine qoşuluvı sebebinden minnetdarlığını bildirdi. Ve «region sakinleri küçlü memlekette yaşamağa, küçlü ükümet ve devlet başı olmasını istegenleri» aqqında bildirdi.
Toplanğanlar, şu cümleden memur ve uquq qoruyıcılar, mukâfatlarnı elde etti.
1993 senesi dekabr 12 künü Rusiye Federatsiyasnıñ Anayasası qabul etildi, 1994 senesi Rusiye prezidentiniñ avalesi ile dekabr 12 künü devlet bayramı olaraq ilân etildi.
2014 senesi fevral soñunda mart başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar
