Qırım müftisi haci Emirali Ablayev qırımtatarlarnı milliy neşilerni (gazeta ve mecmualarnı) desteklemege çağırdı.
Bu aqta Qırım musulmanları Diniy idaresiniñ matbuat hızmeti bildire.
«Qırımtatar gazeta ve jurnalları millet içün zengin qırımtatar tiliniñ, medeniyet ve ahlâqnıñ tiklenüv vastası ola. Olar özlerinde tarih, adet, tarihiy adiseler ile bağlı unikal malümatnı saqlaylar ve zemaneviy mevzularnıñ talilini eteler»,– dedi Qırım müftisi.
O, kendi tarafından musulman diniy cemiyetlerniñ abune olmasını temin etmege söz berdi. Qırım musulman diniy idaresiniñ tertibatında 300-den ziyade neşir bar.
«Halqımızğa ricam bar – bütün gazetalarımızğa abune olmalımız, olarnı oqumaq kerekmiz, oqumağa bilmeseñiz, neşirlerimizni desteklemek içün abune olmalısıñız – borcumızdır: baba, ana, qartbaba ve qartanalarımıznıñ borcu, çünki torunlarımız er şeyni köre. Biz neşirlerimizni desteklemesek, kelecek nesiller de bunı yapmaz. Er bir musulmannıñ, qırımtatarınıñ evinde bu gazetalar olmalı», – dey müfti.
Qırımtatar neşirlerine Qırımnıñ poçta bölüklerinde dekabrniñ 25-ne qadar abune olmaq mümkün.
