İşğal etilgen Qırımda insan aqları boyunca mesüliet yalıñız Rusiye Federatsiyasınıñ ükümeti ve temsiliy organlarındadır. Bu aqta Qırım.Aqiqat mühbirine Qırımtatar Milliy Meclis reisiniñ muavini Nariman Celâl bildirdi.
«Qırımda federal akimiyet organları, uquq qorçalayıcı organları tarafından qırımtatar halqına, onıñ içtimaiy-siyasiy cemiyetlerine ayırı munasebet kösterile. Qanuniyet çerçivesinde nasıldır bir numayışlarnı keçirip olamaymız, mahkeme taqipleri yüz bere, Qırımnıñ kiriş-çıqışında daimiy toqtatuvlar ve ilâhre. Bizde teşkerüvler yalıñız qırımtatar iş adamlarında keçirile. Er şey sanki dersiñ qanuniy sürette yapıla», – dedi Meclis reisiniñ muavini.
Onıñ sözlerine köre, Meclis insan aqlarınıñ riayet etilmesine ıntıla ve insanlarğa şimdi yarımadada olğan qanunlar çerçivesinde öz aqlarını qorçalamağa imkân yaratmağa tırışalar.
«Mında devlet ve Rusiyege qarşı bir belâğat yoqtır», – dey Celâl.
Amma bunıñ ile qırımtatar teşkilâtları «mahsus bir siyasiy sımarış, siyasiy basımğa» rastkelmekte, – dedi o
Qırımtatar Milliy Meclisi dekabr 10 künü keçirilgen toplaşuvında Halqara insan aqları Künü munasebeti ile avaleni qabul etti. Mında qayd etilgeni kibi, Qırımda insan aqları ile yüz bergen vaziyetke köre, Meclis işbu saаda vatandaşlarnıñ faalleştirilüvi boyunca qarar aldı
Qırımtatar falleri devlet akimiyet organları tarafından vatandaşlarnıñ anayasa uquqlarınıñ bozuluvına qarşılığını köstermek maqsadı ile dekabr 10 kününe planlaştırılğan mitingniñ keçirilmesinden vazgeçtiler ve numayışqa akimiyetniñ resmiy iznini talap etmege tırışacaqlar.
Matbuat konferentsiyası qırımtatar faallerine Halqara insan aqları Kününe bağışlanğan tedbirlerni keçirmege yasaq etilgeni ile bağlı.
Çarşenbe sabasında Aqmescit merkezi OMON ve «halq imayesi» vekilleri tarafından sarıp alındı, metallodetekorlar pekitildi.
