İşğal etilgen Qırımda Qırım devlet tibbiy universitetiniñ student ve ocaları dekabr 10 künü narazılıq numayışına çıqtılar. Qırım.Aqiqat mühbiri bergen malümatına köre, mitingde universitetniñ Qırım federal universiteti terkibine kirsetilmesine qarşılıq bildirildi.
Aliy oquv yurtunıñ studentleri aytqanı kibi, olar numayışnı Aqmescitniñ merkeziy meydanında keçirmege planlaştıra edi. Amma olarğa meydan yañı yıl munasebeti ile keçirilecek tedbirler içün azırlanğanını aytıp, mında mitingni keçirmege izin bermediler. Bunıñ yerinde şeer akimiyeti kelecekte ekim olacaqlarğa numayışnı şeer civarında keçirmege teklif ettiler, amma student ve ocalar razı olmadılar. Neticede numayışnı universitet meydanında keçirmege qarar aldılar.
«Biz, akimiyet bizni eşitmegence, numayışnı kene ve kene keçirmege qarar aldıq. Biz universitetimizniñ Qırım federal aliy oquv yurtunıñ terkibine kirsetilmesine qarşı çıqamız. Bu aliy oquv yurtumıznıñ halqara statusınıñ yoq olacağına ketirecek. Bundan da ğayrı, bu al kelecek ekimlerniñ seviyesine de tesir eter», – dep ayttı üçünci kurs studenti Natalya.
Bu kibi fikirni universitetniñ diger studentleri de bildirdi.
«Tibbiy universitetimizniñ federal aliy oquv yurtunıñ terkibine kirsetilmesine qarşımız. Ekim olmağa isteyimiz, oca degil, bu seneniñ soñunda oca diplomını degil de, ekim diplomını elde etmege isteymiz», – dep ayta universitetniñ studenti Elnara.
Narazılıq numayışnıñ iştirakçileri Rusiye prezidenti Vladimir Putinge muracaatnı imzaladılar. Şimdi teşkilâtılar Rusiye akimiyetiniñ seslenüvini bekleyler.
Evel aytılğanı kibi, Qırım federal universiteti Rusiye akimiyetiniñ 2014 senesi avgust ayında Tavriya milliy universitetiniñ negizinde teşkil etildi. Onıñ terkibine yarımadanıñ daa beş aliy oquv yurtu kirdi.
Planlaştırılğanı kibi, QFU terkibine Qırım tibbiy universiteti kirmek kerek edi, amma onıñ yolbaşçılığı, oca ve studentleri akimiyet teklifine qol tutmadılar. Sentâbr ayından universitette aliy oquv yurtunıñ federal olmasına qarşı numayışlar keçirile.
