İslâm Terek rayonında musulman mezarlığına zarar ketirgen suv borunıñ qoyulmasını toqtattılar.
Bu aqta Qırımnıñ medeniy asabalığı qoruvı boyunca «Devlet komiteti»niñ matbuat hızmeti bildirdi.
Mında qayd etkenleri kibi, işçiler «Kemal ata» obasına zarar ketirmediler, işbu yerge «Devlet komiteti»niñ hadimleri kelgen edi. Bunıñ ile mında topraqnıñ taqiqatını keçirmek içün atiqiyatçılarnı celp etecekler.
Qırım musulmanları diniy idaresinde qayd etkenleri kibi, baştaşlarda tapılğan arap yazılarını şimdi müftiyat mütehassısları ögrene. Tapılğan insan naaşlarnı musulman adetleri boyunca kömecek olalar.
Evel Qırım müftiyatı qadimiy mezarlıq olğan yerde suv borunıñ qoyulmasını toqtatmağa ricası ile akimiyetke ricada bulundı.
