Qırımtatar halqınıñ aqlarını qoruv komiteti Qırım «politsiya»sına matbuat konferentsiyasında koordinatorlarğa zelönka septirgen insanğa şikâyet etecek. Bu aqta komitetniñ yolbaşçısı Eskender Bariyev bildirdi, – dep haber ete Qırım.Aqiqat mühbiri.
Bildirilgeni kibi, işgal etilgen Qırmda dekabr 10 künü Halqara insan aqları kününe bağışlanğan tedbirlerniñ keçirilmesi akimiyet tarafından yasaqlanğanı sebebinden teşkil etilgen konferentsiyada erkek zalğa sürip kirdi ve Komitetiniñ koordinatorları – Eskender Bariyev, Sinaver Kadırov ve Abmecit Suleymanovğa zelönka septirdi.
Komitetniñ yolbaşçısı aytqanı kibi, tarikni meydanğa ketirgen erkek Eyvaz Ümerov – Mecilske muhalif küçlerniñ tarafdarı, sabıq faalli, şimdi ise, Bariyevniñ aytqanı kibi, Sudaq şeer başı namzeti ola.
«Eyvaz bugün Sudaq şeerniñ yolbaşçı muavini vazifesini eda ete, şunıñ içün mındadır. İş yerinde degil, iş vaqtında. Mında ne sebepten kelgenini añlap olamayım Bundan da ğayrı, Qırım Cumhuriyetiniñ baş nazir muavini Ruslan Balbekke alâqası olğan insanlar keldi»,– dedi Eskender Bariyev.
Qırım.Aqiqat mühbiri aytqanı kibi, binağa politsiya hadimleri kelgen vaqıtta, tarikçiler endi yoq oldı. Ketkende, matbuat konferentsiyasında bulunğanlar olarnı toqtatmağa areket etmediler. Qırımtatar faalleri aytqanı kibi, qavğa-şamatanı çıqarmağa istemegenleri içün, olarğa ketmege keder etmediler.
Uquq qoruyıcılar matbuat konferentsiyasınıñ iştirakçilerine etilgen ücüm boyunca taqiqatnı keçirmege vade ettiler.
Qırımtatar falleri devlet akimiyet organları tarafından vatandaşlarnıñ anayasa uquqlarınıñ bozuluvına qarşılığını köstermek maqsadı ile dekabr 10 kününe planlaştırılğan mitingniñ keçirilmesinden vazgeçtiler ve numayışqa akimiyetniñ resmiy iznini talap etmege tırışacaqlar.
Matbuat konferentsiyası qırımtatar faallerine Halqara insan aqları Kününe bağışlanğan tedbirlerni keçirmege yasaq etilgeni ile bağlı.
Çarşenbe sabasında Aqmescit merkezi OMON ve «halq imayesi» vekilleri tarafından sarıp alındı, metallodetekorlar pekitildi.
