Qırımtatar falleri devlet akimiyet organları tarafından vatandaşlarnıñ anayasa uquqlarınıñ bozuluvına qarşılığını köstermek maqsadı ile dekabr 10 kününe planlaştırılğan mitingniñ keçirilmesinden vazgeçtiler ve numayışqa akimiyetniñ resmiy iznini talap etmege tırışacaqlar.
Bu aqta Qırımtatar halqınıñ aqlarını qoruv komitetiniñ koordinatorı Eskender Bariyev bildirdi, dep haber ete Qırım.Aqiqat mühbiri.
Bariyev şunı da bildirdi ki, teşkilât mitingniñ keçirilmesine resmiy musaadeni talap etecektir. Bundan da ğayrı, faalli yerli akimiyetniñ qanunsız areketleri sebebinden mahkemege muracaat etecek ola.
«Biz bir de bir insan ile degil de, aq ve qıymetlerimiz oğrunda küreşemiz», – dedi Komitetniñ yolbaşçısı.
İşğal etilgen Qırımda Rusiye akimiyeti Aqmescitte Halqara insan kününe bağışlanğan kütleviy tedbirlerni keçirmege yasaq etti.
Rusiye uquq qoruycı strukturalarınıñ hadimleri Qırımtatar milliy Meclis temsilcilerini ve qırımtatar cemaat teşkilâtlarını mitinge çıqmağa ıntıluvları aqqında tenbiyeledi. Aqmescit merkezine politsiya ve mahsus hızmetlerniñ qoşma quvetleri kirsetildi.
Bu sebepten Qırımtatar halqınıñ aqlarını qoruv Komitetiniñ koordinatorları matbuat konferentsiyasını teşkil etip, Rusiye Federatsiyasınıñ insan aqları boyunca Vekâletli şahısqa, prokuratura ve mahkemelerge muracaat etecekleri aqqına bildirdiler.
