Çarşenbe künü, dekabr 10-da, Qırımtatarlarnıñ medeniyet ve yardımlaşma derneginiñ baş merkezi Ankaradaki Rusiye Federatsiyasınıñ binası yanında narazılıq aktsiyasını ötkerdi, dep haber ete Qırım.Aqiqat mühbiri.
Aktsiyada 500 insan iştirak etti. Olarnıñ qollarında Ukraina, qırımtatar ve Türkiye bayraqları bar edi. Bazıları mart 15-te Qırımnıñ Qarasuvbazar rayonında cesedi tapılğan Reşat Ametovnıñ resimlerinen tura ediler.
Aktsiya iştirakçileri «Qatil Putin, Qırımdan ket», «Sürgün, genotsid devam ete», «Qırımtatarlar teslim olmaycaq» kibi şiarlarnı seslendirdiler.
Aktsiya iştirakçileri Rusiye akimiyetinde Qırımda insan aqları bozumasınıñ toqtatılması ve qırımtatar halqı ve onıñ temsil organı Milliy Mecliske yapılğan basqı toqtatılmasını talap ettiler.
Dekabr 1-de Ankarada qırımtatarlar tarafından Rusiye prezidenti Vladimir Putinniñ Türkiye ziyaretine qarşı narazılıq aktsiyası ötkerilgen edi.
