Aqmescitte dekabr 10 künü Halqara insan aqları Kününe bağışlanğan miting keçirilmesiniñ yasaq etilgeni sebebinden qırımtatar halqınıñ aqları qoruvı boyunca Komitet Rusiye Federatsiyasınıñ insan aqları boyunca Vekâletli şahıs, mahkeme ve prokuraturağa muracaat etecek ola.
Bunı Komitet azaları çarşenbe künü Aqmescitte keçirilgen matbuat-konferentsiyasında bildirdi, dep haber ete Qırım.Aqiqat mühbiri.
Olarnıñ malümatına köre, Halqara insan aqları kününde «Qırım – Vatanım» mevzusında resimler yarışı, «Milliy areketniñ uquq qoruyıcı faaliyeti» serlevalı fotoserginiñ ve «Qırımda insan aqları: mesele ve perspektivalar» mevzusında konferentsiyanıñ keçirilmesi planlaştırıla edi.
Faqat Aqmescit akimiyeti işbu tedbirlerni şeerniñ merkezinde keçirmege izin bermedi. Faallilerge diger yerlerni teklif ettiler, olardan biri – Zenaat birligi medeniyet evi yanındaki meydan oldı.
Komitetniñ koordinatorları aytqanı kibi, teşkilât tedbirlerniñ işbu yerde keçirilmesi içün arizanı yollap, kene de menfiy cevap alğan edi.
«Qırım akimiyeti insan aqlarına bağışlanğan numayışlardan qorqa, bu – qırımtatarlarğa nisbeten devam etken genotsidniñ bir delili ola: konferentsiya, sergi, bala resimleri, numayışlardan qorqalar…»,– dedi Komitetniñ koordinatorı, Qırımtatar Milliy Meclis azası Eskender Bariyev.
Berilgen malümatqa köre, Qırımda «prokuratura», FSB ve MVD hadimleri Qırımtatar halqı aqlarını qoruv komitetiniñ koordinatorları bulunğan qavehanege kelip, dekabr 10-da İnsan aqlarını qoruv kününde mitingler keçirilmesiniñ yasağı aqqında ihtar ettiler.
Çarşenbe sabasında Aqmescit merkezi OMON ve «halq imayesi» vekilleri tarafından sarıp alındı, metallodetekorlar pekitildi.
