Link açıqlığı

Saatnıñ esas haberi

Qırımnıñ Tibbiy universiteti narazılıq aktsiyasına çıqacaq


Çarşenbe künü, dekabr 10-da, Qırım Devlet tibbiy universitetiniñ talebe ve ocaları aliy oquv yurtınıñ Qırım federal universiteti terkibine kirsetilmesine qarşı narazılıq aktsiyasını ötkerecek olalar.

Yerli saatke köre saat 15-te başlanacaq mitingde Rusiye prezidenti Vladimir Putinge muracaat altında imzalar toplanacaq.

Qırım devlet tibbiy universitetiniñ strategik inkişaf boyunca rektor muavini Aleksandra Truşkeviçniñ Qırım.Aqiqat mühbirine bergen malümatına köre, aliy oquv yurtı Aqmescit icra akimiyetine muracaatta bulunıp, Lenin meydanında narazılıq aktsiyasınıñ ketirilmesi aqqında bildirgen edi, lâkin buña izin berilmedi.

«Bizge şeer merkezinde aktsiyanı keçirmege izin bermediler, anda yañı yıl naratı donatıla eken. Lâkin onı öyle de qoymadılar», – dedi rektor muavini.

Akimiyet şeer çetinde piket ötkermege teklif etti, lâkin tibbiy universitet aliy oquv yurtınıñ sıñırlarından çıqmamağa qarar aldı.

Qırım federal universiteti Rusiye ükümetiniñ qararınen aqımdaki seneniñ avgust ayında Vernadskiy adına Tavriya milliy universiteti esasında meydanğa ketirildi. Onıñ terkibine 5 aliy oquv yurtı kirdi.

Qırım tibbiy universitetini de Federal universitet terkibine kirsetecek ediler, lâkin onıñ reberligi, oca ve studentleri razı olmadılar. Sentâbr ayında aliy oquv yurtında federal universitet terkibine kirsetilmesine qarşı narazılıq aktsiyaları olıp keçti. Qırım «baş naziri» Sergey Aksönov aliy oquv yurtını yañı qurulğan universitet terkibine kirsetmek yañlış olğanını tanıdı.

Buña baqmadan, oktâbr soñunda Qırım «Nazirler şurası» tibbiy universitet mal-mülkini Qırım federal universitetine bermege qarar aldı.

XS
SM
MD
LG