Link açıqlığı

Qırımtatar Milliy Meclis reisi Refat Çubarov Qırımğa kirip olamağanında sebep ilk sefer İnsan aqlarını qoruv kününi Vatanından tış qayd etmege mecbur.

Bunı o Facebook saifesinde yazdı.

Aynı vaqıtta o, yarımadada qırımtatar halqına yapılğan basqı ve yasaqlarnı qayd etti.

«Soñki yıllar devamında ilk sefer İnsan aqları kününi Vatanımdan uzaq bir yerde qarşılayım... İlk sefer Qırımnıñ şimdiki akimiyeti İnsan aqları künü munasebetinen kütleviy tedbirler keçirilmesini yasaq etti... İlk sefer İnsan aqları kününde Qırımtatar Milliy Meclis azasını (bu sefer menim muavinim Ahtem Çiygoznı) sorğuğa çekeler...», – dep yazdı Çubarov.

Meclis reisi «qomşularnen barışıq içinde yaşama printsiplerinden keçkenlerni» ceza beklegenini ayta.

«Halqara vaqialar tecribesi köstere ki, qomşularnen barışıq içinde yaşama printsiplerinden keçken bütün insanlarnı ceza bekley. Demek ki, tezden bizler Mahsus halqara mahkemeniñ maznunlar yerinde bizge tanış olğan Qırım betlerini (ilk sefer) körecekmiz...», – dep yaza Çubarov.

Çarşenbe künü, dekabr 10-da, işğal etilgen Qırımda qırımtatar faalleri İnsan aqlarını qoruv künü munasebetinen ananeviy mitingni keçirmege planlaştıra ediler. Lâkin yerli akimiyet bu tedbirlerni yasaq etti. «Prokuratura» vekilleri ise bunıñnen bağlı ihtarnı seslendirdi.

Bu sene mayıs ayında Qırımtatar Milliy Meclisine ilk sefer sürgünlik yıllığı munasebetinen matem miting keçirilmesini yasaq etken ediler.

XS
SM
MD
LG