Qırımtatar Milliy Meclis reisi Refat Çubarov salı künü, dekabr 9-da, Brüsselde bulunır eken, Avropa birligini Rusiye prezidenti Vladimir Putinni toqtatmağa ve qırımtatarlarnı taqiplerden qorumağa çağırdı.
«İşğalci akimiyet taqip etilgen qırımtatarlarğa nisbeten içtimaiy yaşayışnıñ Putin standartlarını köstere», – dedi Çubarov.
Azatlıq Radiosınıñ malümatına köre, Çubarov «Ukraina Avropa birdemligi içün bir sınav olaraq» konferentsiyasında iştirak etti.
«Eñ esası – Qırımda insanlarnıñ, qırımtatarlarnıñ ve digerleriniñ, telükesizligi, anda daimiy halqara nezaretçiler missiyası olmaq kerek», – dey o.
Refat Çubarov ve qırımtatarlarnıñ milliy lideri Mustafa Cemilev Brüsselge kelip, Avropa parlamentiniñ işi ve diger tedbirlerde iştirak etmege başladılar. Olarnıñ programması üç künü sürecek.
Çubarovnıñ Facebook saifesinde yazğanlarına köre, Avropa parlamentiniñ eñ büyük fraktsiyası olğan Avropa halq firqası ile beraber azırlağan programmaları ğayet büyük ve toyğundır.
