Qırımtatar Milliy Meclis reisiniñ muavini Ahtem Çiygoznı Rusiye Taqiqat komitetiniñ Qırım idaresine şaat olaraq sorğuğa çekeler, dep haber ete QHA.
Çiygoznıñ aytqanına köre, taqiqatçı ile körüşüv dekabr 10 künü saat 15-ke belgilengen. Subetniñ ilk mevzusı – mayıs 3-te keçirilgen narazılıq aktsiyası.
«Maña telefon etip, mayıs 3 işi boyunca Taqiqat komitetine davet ettiler. Men mıtlaqa kelecegimni ayttım. Ve biz taqiqatçınen çarşenbe künü saat üçte körüşmege keliştik», – dedi Çiygoz.
Onıñ qayd etkenine köre, soñki vaqıtları olğan apis ve para cezalarınıñ qanunğa köre belgilenmemesini köz ögüne alsaq, «bunıñ kibi tedbirlerniñ qanunğa köre yapılacağına» ümüt etmemek kerek.
«Ne bekleyim? Semetdeşlerimizge qanunsız alda para cezaları belgilene, «sımarışqa köre» apiske alalar, elbet de, bunıñ kibi tedbirler keçirilmesinde er şey qanunğa köre yapılacağına ümüt etmemek kerek. Onıñ içün Taqiqat komitetine özüm baracam, Allah bile ne olacaq», – dep ayttı Çiygoz.
Mayıs 3-te Mustafa Cemilevni Qırımğa kirsetmediler. Bundan sebep qırımtatarlar Ermeni Bazardaki «sıñırda» narazılıq aktsiyasını keçirdiler.
Soñra Qırım «prokurorı» Natalya Poklonskaya Meclis reisi Refat Çubarovnı «ekstremistik faaliyeti aqqında tenbiyelep, buña riayet etilmese, Meclis yoq etilecek ve onıñ faaliyeti yasaq etilecek», dep bildirdi. Bundan soñra narazılıq aktsiyasınıñ iştirakçilerine nisbeten mahkemeler ötkerildi, ve para cezası belgilendi.
Küzde yarımadada mayıs 3 işi boyunca yañı bir sıra yaqalavlar oldı. Uquq qorçalayıcılar ve Meclis bunı siyasiy sımarış dep adlaylar.
