Bir kimse iç bir zaman Rusiyeni boysundıramadı. «... Olar bizni boysundıracaq olalar. Bizim yardımımıznen kendi problemlerini çezecek olalar, bizge tesir etecek olalar. Tarihta iç bir vaqıt bir kimse Rusiyege nisbeten bunı yapamadı, ve yapamaz». Bunı yaqınlarda prezidentimiz V.V.Putin ayttı. Bütünrusiye halq frontu ile körüşüvde. Ve bu ter-temiz kerçektir. Tarihnı aldatamazsıñ.
XIX asırda frenkler Rusiyege kirip, onı boysundıracaq oldılar. Neticede Rusiye Frenkistannı yıqtırdı. Kazaklar ise Parijde yürüş keçirdiler. Bugünde-bugün Frenkistannıñ iqtisadiyat, tasil, tibbiyet inkişafı ğalebe qazanğan Rusiyege köre daa yüksek seviyededir. Frenkler ise rusiyelilerden daa yahşı yaşaylar.
1939 senesi finliler Sovet Sotsialistik Cumhuriyetler Birligi ve Finlândiya arasında cenkni başlatalar. Bu cenkte de Sovetler birligi Finlândiyanı yeñe. Ve onıñ bazı topraqlarını bile özüne ala. Bugünde-bugün Finlândiyanıñ iqtisadiyat, sağlıq saqlav, içtimaiy qoruv inkişafı ğalebe qazanğan Rusiyege köre (o zamanlarnıñ Sovetler birligi) daa yüksek seviyededir. Finliler ise rusiyelilerden daa yahşı yaşaylar.
1941 senesi Almaniya Sovetlerge qarşı cenkni başlattı. Sovetler birligine ücüm etip, onı yoq etecek oldı. Neticede Almaniya yutturdı. Ve Sovetler birligi onıñ bazı topraqlarını bile aldı. Bugünde bugün Almaniyanıñ iqtisadiyat ve bir sıra diger saalardaki inkişafı ğalebe qazanğan Rusiyege köre daa yüksek seviyededir. Alman ise, yañılmasam, rusiyeliden daa yahşı yaşay.
1945 senesi Sovetler birligi özü Yaponiyağa cenkni ilân etip, onıñ Kvantun ordusını dağıttı. Yaponiya Sovetler birligi ve onıñ ittifaqdaşlarına yutturdı. Sovetler birligi ise onıñ bazı topraqlarını bile özüne aldı. Bugünde-bugün Yaponiyanıñ iqtisadiyat, semereli tibbiyet ve diger saalardaki inkişafı ğalebe qazanğan Rusiyege köre (o zamanlarnıñ Sovetler birligi) daa yüksek seviyededir. Yapon ise rusiyeliden daa yahşı ve uzun ömür yaşay...
2014 senesi Ukraina Rusiye ile qavğa etti. Rusiye ise sabır etmeyip, eski rusiyeli, lâkin Ukrainağa ediye etilgen Qırımnı özüne qaytardı. Ve «Novorossiya» sözüni kirsetti. Ve Ukraina ile cenk zıddiyetine benzegen vaziyette buluna...
Meraqlısı şu ki, yaqın zamanda Rusiye ve rusiyeliler buña nasıl baqacaqlar?... Em de Ukraina. Belki de, bütün uruşlarda ğalip çıqmamaq kerek? İç olmasa bir kere yutuqsız olmasına razı olmaq...
Vladimir Bekiş, strategik havfsızlıq eksperti
«Fikir» rubrikasında bildirilgen tüşünceler müelliflerniñ noqtaiy nazarını aks ettirip, muarririyetnen aynı olmaması mümkün
