Link açıqlığı

Rusiye jurnalisti uquq qorçalayıcı mukâfatnı alıp, onı qırımtatarlarğa bağışladı


«Moskovskiy komsomolets» gazetasınıñ baş muarrir muavini Ayder Mujdabayev

Rusiyede qırımtatar jurnalisti, «Moskovskiy komsomolets» gazetasınıñ baş muarrir muavini Ayder Mujdabayev Moskva Helsinki gruppasınıñ insan aqlarını qoruv saasında mukâfatına nail oldı. Bunı o Facebook saifesinde yazdı. Mukâfatnı Rusiye uquq qorçalayıcısı ve dissident Lüdmila Alekseyeva berdi.

«Moskva Helsinki gruppasınıñ taqdirlenmek fursatını bergen er bir azasına teşekkürler bildirem. Lâkin bu mukâfat menim degil. Men yahşı añlayım ki, Qırımnıñ qanunsız «qoşulması» olmasa edi, mukâfatnı diger jurnalist alır edi. Buña ne qadar bermege azır olğanımnı bilse ediñiz», – dep yazdı Mujdabayev.

Rusiye jurnalisti bu mukâfatnı «qırımtatar halqı, er bir qırımtatarı, em de ATR telekanalınıñ hadimlerine» bağışalğanını ayttı.

«Eminim, kerçek yeñecek, ve millet mensüplige köre horlavlar cezasız qalmaycaq. Men qanunsız areketler ve yamanlıq yapqan adamlarğa bunı hatırlamağa rica etem. Qırımtatarlarğa ve Qırımnıñ bütün namuslı insanlarğa sabırlı olmağa tileyim. Daa bir zaman devamında er şey yaramay olacaqtır. Lâkin soñu yahşı olacaq», – dedi o.

Bu sene mukâfat alğan insanlar arasında – «Maşina vremeni» gruppasınıñ lideri Andrey Makareviç, Pskov şeer qanun keñeşiniñ deputatı Lev Şlosberg, «Grajdanskoye sodeystviye» komitetiniñ reisi Svetlana Gannuşkina, «Eho Moskvı» radiosınıñ alıp barıcısı Natella Boltânskaya, adliyeci Ramil Ahmetgaliyev ve digerleri.

Moskva Helsinki gruppasınıñ mukâfatı er sene İnsan aqları kününde berile. Bu sene taqdirlev merasimi dekabr 9-da Moskva Saharov merkeziniñ Sergi salonında olıp keçti.

XS
SM
MD
LG