Rusiye ordusı salı künü, dekabr 9-da, işğal etilgen Qırım ile sıñırda Herson vilâyetiniñ bir qısmını terk etti. Ukraina Devlet sıñır hızmetiniñ yolbaşçısı Viktor Nazarenkonıñ bildirgenine köre, topraq Ukraina prezidenti Petro Poroşenkonıñ teşebbüsi ile qurulğan işçi gruppasınıñ Rusiye tarafı ile muzakereler neticesinde olğan añlaşmalar esasında azat etildi.
Devlet sıñır hızmetiniñ yolbaşçısı bildirdi ki, Rusiye ordusı Strelkovoye köyünde Arabat belinden 8 km, Çonğar kiriş noqtası rayonında (Herson vilâyetiniñ Geniçesk rayonı) 2 km ve Ad yarımadasında (Qazan Tip burnu) 1 km qadar çekildi.
Salı künü, dekabr 9-da, işğal etilgen Qırımnıñ mezkür sıñırlarından Ukraina ordusı da çekile, azat etilgen topraqlar ise Ukraina Devlet sıñır hızmetiniñ nezareti altına keçe, – dep haber ete Qırım.Aqiqat saytı.
Jurnalistlerniñ Rusiye ve Ukraina tarafları arasında muzakerelerde kim iştirak etti ve añlaşmalar aqqında bergen sualine, – Nazarenko «bu aqqında aytmaq vekâletleri olmağanını» dedi.
2014 senesi fevralniñ soñunda, martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
