«Prokuratura» ve Aqmescit politsiyası Qırımtatar halqı aqlarını qoruv Komitetini dekabr 10-da Halqara insan aqları künü munasebetinen miting keçirilmesiniñ yasağı aqqında ihtar ettiler.
Bunıñnen bağlı vesiqalarnı Qırımtatar Milliy Qurultayınıñ Merkeziy saylav komissiyasınıñ reisi Zair Smedlâyev Facebook saifesine qoydı.
Prokuraturanıñ «ekstremistik faaliyetine qarşılıq ve miting, numayış, yürüş ve piket qanunları aqqında ihtar vesiqasında» aytıla ki, teşkilâtçılar miting keçirilmesi içün Aqmescit akimiyetinden izin almadılar.
Vesiqada qayd etile ki, buña baqmadan Qırımtatar halqı aqlarını qoruv komiteti dekabr 10-da saat 14:00 (yerli vaqıtqa köre) tedbirni keçirecek ola.
«İşbu tedbirlerde Rusiyege qarşı laflar olacaq», – aytıla «prokuraturanıñ» tenbi vesiqasında.
Qırımtatar halqı aqlarını qoruv komiteti Aqmescit akimiyeti insan aqları kününde miting keçirilmesine izin bermedi. Bundan sebep faaller narazılıq piketini ötkerecek ediler.
