Qırımnıñ öz başına ilân etilgen baş naziri Sergey Aksönov dekabr 8-de bergen malümatına köre, Rusiye Federatsiyasından Ukrainağa elektrik energiyasını berüv añlaşmaları Qırım yarımadasınıñ elektrik energiyası ile temin etüvni kefil ete. Bunı bazarertesi künü, dekabr 8-de, TASS bildire.
«Yanılmasam, bugün Rusiye Federatsiyasından Ukrainağa elektrik energiyasınıñ berilmesi aqqında añlaşma imzalandı. Bu añlaşma esasında Qırım Cumhuriyetine de elektrik energiyası berilecek», – dedi o.
Aksönovnıñ aytqanına köre, al-azırda Ukrainadan Qırımğa elektrik energiyasını berüv meselesi al etildi.
Dekabr başında Ukraina işğal etilgen Qırımğa berilecek elektrik energiyasını bir qaç kere eksiltken edi. Bundan sebep yarımadanıñ bazı mesken yerlerinde qazaiy cedveller kirsetilgen edi.
2014 senesi fevralniñ soñunda, martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
