İşğal etilgen Qırımda mart 16-nı – «referendum» ötkerilgen kününi – tatil olaraq ilân ete bileler. Bunı Qırım «spikeri» Vladimir Konstantinov «Rossiya segodnâ» radiosınıñ efirinde bazarertesi künü, dekabr 8-de, bildirdi, – dep haber ete Qırımnıñ öz başına ilân etilgen ükümet «ruporı» Krıminform saytı.
«Cumhuriyetimiz içün ğayet müim bir kündir. Bizler birinci yıllıqqa yaqınlaşamız, bu bayramnıñ cumhuriyet bayramı olması müimdir. Bizler bu künni tatil olaraq ilân etip, bizler içün ve bütün Rusiye içün ğayet müim bir kün olğanı içün onı yüksek seviyede qayd etecekmiz», – dep qayd etti o.
2014 senesi fevralniñ soñunda, martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
