Link açıqlığı

Qırımtatar Milliy Meclis reisiniñ muavini Ahtem Çiygoznıñ Qırım «prokurorı» Natalya Poklonskaya ile bazarertesi künü, dekabr 8-ne, belgilengen körüşüvi keçirilmedi. Bu aqqında Çiygoz Qırım.Aqiqat saytına bildirdi.

Meclis reis muavininiñ aytqanına köre, o, Qırım «prokuraturasına» Poklonskaya aytqan saatte – saat 15-te – keldi. Lâkin onı qabul etmediler.

«Men qırq daqqa qabul odasında bekledim. Lâkin onıñ odasına öyle de kiremedim. İnsanlar kirgenini ve çıqqanını kördim. Yazıq ki, daa beklemege imkânım olmadı – saat 16-da başqa körüşüvim bar edi», – dep ayttı Ahtem Çiygoz.

Onıñ qayd etkenine köre, Poklonskaya belgilegen vaqıtta o kene de onıñnen körüşmege azır.

Meclis reisiniñ muavini bildirdi ki, o, dekabr 6-da aqşam Qırım sıñırından keçer eken, prokuror onı Qırımda bir de bir kütleviy tedbirler keçirilmesiniñ yasağı aqqında ihtar etti.

«Poklonskaya ile laf etip, Qırımda ğayıp olğan insanlar, Rusiye qanunları çerçivesinde milliy aqlarımıznı qorumaq içün mitingler yasağı aqqında ayttım. O, bazarertesi künü körüşip, bu aqqında qonuşmağa teklif etti», – dedi o.

Qırım.Aqiqat bildirgeni kibi, Qırım akimiyeti qırımtatarlarğa dekabr 10-da İnsan aqlarını qoruv künü munasebetinen bir de bir aktsiyalar keçirilmesini yasaq etti.

XS
SM
MD
LG