İşğal etilgen Qırım akimiyeti tarihiy binalarnıñ yañıdan qurulması ve ğayrıdan tiklenmesine tahminen 7 mlrd. ruble sarf etmege vade ete. Bunı Qırımnıñ öz başına ilân etilgen baş naziri Sergey Aksönov bazarertesi künü, dekabr 8-de, bildirdi, – dep haber ete Qırımnıñ öz başına ilân etilgen ükümet «ruporı» Krıminform saytı.
Onıñ aytqanına köre, bu sermiya federal paradan ğayrı medeniyet nazirliginden ayırılacaq.
«Bizim müim meselelerimiz bar. Energetika, suv teminlevi, aşayt mahsulatı ve ilâc fiyatları, ve biz olarnı al etsek, para tarihiy binalarnıñ yañıdan qurulmasına da ayırılacaq. Federal programmalarından ğayrı tahminen 7 mlrd. rub. berilecek», – dep qayd etti Aksönov.
Onıñ bildirgenine köre, al-azırda ükümet tarihiy binalarnıñ restavratsiya programmasını belgiley.
2014 senesi fevralniñ soñunda, martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
