Link açıqlığı

Avropa birliginiñ tışqı işler ve havfsızlıq siyasetiniñ yuqarı vekili Federica Mogherini Türkiyeni Rusiyege qarşı cezalar rejimini bozmamağa çağıra.

Bunı o dekabr 8-de başlağan Türkiye ziyareti çerçivesinde Türkiye liderleri ile körüşüvinde bildirdi, dep haber ete Azatlıq Radiosı.

Muzakerlerniñ ekinci mevzusı Avropa birligi ve Türkiyeniñ «İslâm devleti» gruppirovkasına qarşı areketlerde işbirligi oldı.

Federica Mogherini bu ziyaretni «Avropa birligi ve Türkiye arasında munasebetlerniñ strategik müimliginiñ» delili dep adladı.

Türkiyeniñ Avropa Birligine kirüv meselesi 2005 senesinden berli devam ete.

Ankara Rusiyeniñ Ukrainada yapqanları içün oña qarşı cezalarğa qoşulmadı. Avropa birligi Türkiyeni cezalar rejimine qoşulmağa çağıra.

Keçken afta Rusiye prezidenti Vladimir Putin Türkiyeni ziyaret etip, «Cenübiy aqım» gaz borusı leyhasınıñ toqtatılması aqqında ilân etti ve Türkiyeni alternativ gaz borusınıñ qurucılığında eñ eyi iş ortağı dep adladı.

XS
SM
MD
LG