Link açıqlığı

Qırımda 200-den ziyade insan «Tatlı ses» istidatlar yarışında iştirak etti


İşğal etilgen Aqmescitte dekabr 6-da Qırım drama Ukraina muzıkalı teatrinde «Tatlı ses» istidatlar yarışınıñ altıncı mevsiminiñ final kontserti olıp keçti. Bu sene yarışta 200 insan iştirak etti, olardan 21 eñ eyi icracı saylandı.

ATR telekanalınıñ icra müdiri Şevket Memetov Qırım.Aqiqat mühbirine bildirdi ki, bu sene yarış çeşit millet vekillerini topladı.

«Farqlı millet vekilleri iştirak ettiler. Eñ esası – balalar qırımtatar halq yırlarını yırladılar, olar bunı is ettiler. Olar bu topraqnıñ tilinde yırladılar», – dedi o.

İştirakçiler «Yır» ve «Oyun» nominatsiyalarında çıqışta bulundılar. Bu sene teşkilâtçılar «söz ustalığı» nominatsiyasından vazgeçtiler.

«Keçken senelerniñ tecribesine köre, yaş iştirakçilerni oyun ve yırlar meraqlandıra», – dep ayttı ATR telekanalınıñ baş müdiri Elzara İslâmova Qırım.Aqiqat saytına.

2014 senesi fevralniñ soñunda, martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.

XS
SM
MD
LG