Link açıqlığı

«Prokuror» Poklonskaya Meclisni izin berilmegen mitingler keçirilmesiniñ yasağı aqqında tenbiyeledi


Qırımtatar Milliy Meclis reisiniñ muavini Ahtem Çiygoz Qırım «prokurorı» Natalya Poklonskayadan işğal etilgen Qırımda ruhset berilmegen mitingler keçirilmesiniñ yasağı aqqında ihtar aldı. Bu aqqında Qırımtatar Milliy Meclis reisiniñ muavini Nariman Celâl Facebook saifesinde cumaertesi künü, dekabr 6-da, yazdı.

«Aqşam saat altılarda Qırım kirişinde Rusiye sıñırcıları Kiyevden Bağçasarayğa qaytqan Qırımtatar Milliy Meclis reisiniñ muavini Ahtem Çiygoznı eki saat tuttılar. Qırım prokurorı Natalya Poklonskaya dekabr 10 Meclis adet üzre Aqmescit merkezinde İnsan aqlarını qoruv künü munasebetinen miting keçirgen künü arfesinde Qırımda izin berilmegen kütleviy tedbirler keçirilmesi aqqında tenbiyeledi», – dedi Nariman Celâl.

Onıñ aytqanına köre, Ahtem Çiygoz «prokurorğa» Mecliske bir de bir kütleviy tedbir keçirilmesi yasaq etilgenini hatırlattı.

«Natalya Poklonskaya bu meseleni Meclis vekilleriniñ iştiraki ile Qırımnıñ arbiy strukturalar reberleriniñ toplaşuvında muzakere etmege teklif etti. Soñra Ahtem Çiygoz Qırımğa kirip oldı», – aytıla beyanatta.

2014 senesi fevralniñ soñunda, martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.

XS
SM
MD
LG