Dekabr 13-te Aqmescitte Qırımda islâm ve islâm alemi tarihına dair studentler içün yarış keçirilecek. Bunı Qırım musulmanları Diniy idaresiniñ matbuat hızmeti bildire.
Qırım musulmanları Diniy idaresi ve Qırım cumhuriyetiniñ tasil ve ilim, gençlik ve sport nazirligi yarışnı teşkil etken «Emel» cemaat teşkilâtı, «Sozidaniye» Medeniyet merkezi, «Doğru yol» cemaat teşkilâtına qoltuttılar.
Mezkür yarış soñki dört sene devamında keçirile. İştirakçiler arasında daa çoq mektep talebeleri bar edi. Lâkin bu sene beşinci yarış munasebetinen aliy oquv yurtlarınıñ studentlerini celp etmege qarar aldılar.
QMDİ matbuat hızmeti bildire ki, studentlerniñ Muhammed Peyğamberiniñ ömüri, İslâm temeli, Qırım musulmanlarınıñ urf-adetleri saasında bilgilerine qıymet kesilecek.
Yarışta yüz insannıñ iştirak etmesi beklenile. Finalda güzel bahşışlar berilecek, ğalebe qazan kişi ise planşet saibi olacaq.
