Link açıqlığı

Hanlar sarayınıñ hadimleri Qırım tarihı kitabı kerçek malümat esasında yazılacağına ümüt eteler


Rusiye tarih cemiyeti Qırım tarihı boyunca yañı ilmiy işni yazmağa başladı. Bu leyha üzerinde işke Bağçasaray tarihiy-medeniy qoruğınıñ hadimleri de celp etilecek. Bunı qoruq müdiri Elmira Ablâlimova 2014 senesi dekabr 5-te Bağçasaraydaki matbuat konferentsiyasında bildirdi.

«Rusiye tarih cemiyetiniñ toplaşuvı olıp keçti, men de davet etilgen edim. Men dedim ki, bu iş yañı sualler doğurmamaq kerek, ve bar olğan suallerni yoq etmek kerek. Çünki qırımtatarlar Vozgrin yazğan kitapqa esaslanalar. Qırımnıñ diger ealisi başqa tarihqa esaslana. Eq müimi şu ki, yañı iş farqlı millet ve dir vekilleri yaşağan regionda bizim farqlarımıznı degil de, aynı taraflarımıznı tapmaq kerek», – dep qayd etti Ablâlimova.

Müdirniñ aytqanına köre, ilmiy iş üzerinde qoruq hadimleri de çalışacaq. Lâkin olarnıñ mevzuları daa belli degil.

«Belki de, Qırım hanlığı zamanı, belki de, Gasprinskiy zamanı olacaq», – dedi Ablâlimova.

Onıñ malümatına köre, Qırımnıñ yañı tarihı Rusiye ilmiy-gumanitar fonduna berilgen devlet grantı sermiyasına üç sene devamında azırlanacaq.

Bu sene noyabr ayınıñ soñunda Qırım akimiyeti Rusiye arbiy-tarihiy cemiyeti neşir etken «Qırım tarihı» kitabını taqdim etti. Yarımada akimiyeti onı «ilk ve kerçek» dep adladı.

«Böyle bir kitap olmaq kerek. Bir çoq qırımlı da qoşulğan Rusiye alimleriniñ bu işi Qırım tarihımıznıñ kerçek saifelerini aydınlatmaq kerek», – dep ayttı Qırımnıñ baş naziri Sergey Aksönov.

«Qırım tarihı» kitabında soñki seneniñ yarımadada olıp keçken adise-vaqiaları da mevcut. Kitapnıñ bab adları içindeki malümat kerçek olğanında şübelenmege mecbur ete. Meselâ, «Kiyevniñ baş ağrısı. Qırım Ukraina terkibinde (1991–2014)» ya da «Qırım üzerinde kene de Georgiy renkleri. Qırımnıñ Rusiyege qoşulması».

XS
SM
MD
LG