Link açıqlığı

Vatanına qaytıp kelgen insanlarnıñ Qırımda bedava topraq almaları içün mında beş yıl yaşamaları kerek


Vatanına qaytqan insanlar diger vatandaşlar kibi bedava topraq damartısınıñ saibi olmaq içün mında beş yıl yaşamaq kerekler. Krım Media malümatına köre, böyle bir qarar «Qırım Cumhuriyeti Devlet şurasınıñ» mal-mülk ve topraq munasebetleri komitetiniñ toplaşuvında qabul etildi.

«Devlet şurasınıñ» milletlerara munasebetler komitetiniñ reisi Edip Gafarov «Devlet ya da belediye mal-mülkinde olğan topraq damartılarını berüv, ve topraq munasebetleriniñ bazı meseleleri aqqında» qanunğa deñişmeler kirsetip, repatriantlarnıñ topraq damartısını almaq içün mında beş yıl yaşamalarını kerekligini lâğu etmege teklif etken edi.

Gafarov komitet toplaşuvında bildirdi ki, böyle bir deñişme olmaq kerek, çünki Vatanına qaytıp kelgen adamlarnıñ 60% mesken saibi degil.

Lâkin komitet azaları buña qoltutmadılar.

Bundan ğayrı, şahsiy garaj qurucılığı, ve uquq qoruyıcılarnıñ kvotaları aqqında teklifler qabul etilmedi.

İşbu qanun yalıñız «Qırım Cumhuriyetiniñ» mal-mülkinde olğan topraq damarılarına aittir.

Noyabr 26-da Devlet şurası «Devlet ya da belediye mal-mülkinde olğan topraq damartılarını berüv, ve topraq munasebetleriniñ bazı meseleleri aqqında» qanunnı qabul etti. Vesiqa topraq aqları olğan vatandaşlar cedvelini ve teşkilât ve müessiselerniñ topraq alma şartlarını belgiley.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.

XS
SM
MD
LG