Uquq qorçalayıcı teşkilâtlarnıñ faalleri bank hızmetleri saasında qırımlılarnı ayırım yapuvğa qarşı aktsiya keçirilmesini ilân ettiler. Qırımdan kelgen Ukraina vatandaşlarınıñ aqlarını sıñırlağan bank bölüklerine «Qırımlılar içün degil» nakleykalarını yapıştırmağa teklif etile. Bu aqqında «Almenda» vatandaşlar maarifi merkeziniñ reisi Olga Skripnik Facebook saifesinde bildirdi.
«Banklarda qırımlılar kendilerini rezident olaraq is etmeyler. Bunıñ kibi banklarnı levhalarnen «qayd etmege» teklif eteler», – dep yazdı uquq qorçalayıcı.
Skripnik bildirdi ki, nakleykalar azır, ve er kes teşkilât ofisine kelip, olarnı ala bile.
Milliy bank noyabr 3-te «Qırım» serbest iqtisadiy zonada vaqtınca işğal devamında para qanunlarınıñ ayrı qaidelerini işletüv aqqında» №699 qararını qabul etti. Vesiqağa binaen, Qırımda qayd etilgen yuridik ve fizik şahıslar rezidentler olaraq tanılmay. Bunıñnen beraber, banklar işğal etilgen yarımadada qayd etilgen yuridik şahıslarnıñ esaplarını qapatmaq kerek.
Uquq qorçalayıcılar işbu qararnı ayırım yapqan vesiqa olaraq tanıp, ukrain mahkemeleri davalarnen tola bilecegini aytalar.
