«Kiyevo-Mogilânskaya akademiya» Milliy universitetinde dekabr 22-de «Ukrainanıñ tamır halqı qırımtatarlarnıñ aqlarını temin etüvde Ukrainanıñ yolu» adlı konferentsiya keçirilecek. Bunı Ukraina prezidentiniñ qırımtatarlarnıñ işlerinden vekâletlisiniñ resmiy Facebook saifesinde bildireler.
İlândaki malümatqa köre, konferentsiyanıñ maqsadı Ukraina Yuqarı Radasınıñ yañı çağırılışınıñ qanun çıqarıcı faaliyeti içün qırımtatar meselesini aktual etmektir.
«2014 senesi mart 20-de Ukraina Yuqarı Radasınıñ «Qırımtatar halqınıñ Ukraina devleti terkibinde aq-uquqlarını kefil etüv aqqında Ukraina Yuqarı Radasınıñ beyanatı aqqında» qararı qabul etildi. Oña em qırımtatarlar, em de ekspertler yüksek qıymet kestirler. Maalesef, 2014 senesiniñ soñunda ğayet az yapılğanını ayta bilemiz. Bu qarar muzakere mevzularından biri olacaq», – aytıla ilânda.
Uquq qorçalayıcı teşkilâtlar yarımada işğalinden soñ qırımtatar ealisiniñ vekillerine basqı yapılğanını toqtamayıp bildireler. Ukraina Tışqı işler nazirligi bu vaziyetni qırımtatarlarnıñ ekinci sürgüni dep adladı.
2014 senesi fevral soñunda mart başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
