Link açıqlığı

Eski Qırım civarında orta asırnıñ musulman baştaşları tapıldı


Eski Qırım civarında İslâm-Terek rayonınıñ Tamğacı köyünde (İzümovka) suv ağı keçirilgen arada musulman baştaşları ve insan kemikleri tapıldı, dep haber ete Qırım musulmanları Diniy idaresiniñ matbuat hızmeti.

Tahminlergen köre, baştaşlar XIII-XIV asırlarına aittir.

İslâm-Terek rayonınıñ baş imamı Nariman Koroğlu ve «Vetan» Eski Qırım din cemiyetiniñ reisi Rasim Sadredinov musulman qabirleri olğan yerge barıp, suv ağını kimler keçirgenini ögrenecek ediler, lâkin işçiler tapılmadı.

Rasim Sadredinovnıñ aytqanına köre, bu yer «kurgan Kemal-ata» adını taşıy, halq arasında anda Mamay (1335? – 1380, Kefe) mezarı yerleşkenini aytalar.

QMDİ matbuat hızmeti bildire ki, tapılğan insan kemikleri suv ağı keçirilmesini toqtatmadı. Bundan sebep Qırım Müftiyatı devlet organlarına muracaat etecek ola. Bu yerge tarihçı ve atiqiyatçılarnı celp etmege planlaştıralar.

XS
SM
MD
LG