Ukrain yırcısı Jamala Stereo Plaza Kiyev kontsert salonında şahsiy kontsertni ötkerecek. Yırcı işğal etilgen Qırım ve Ukraina şarqından mecburen köçip kelgen insanlarğa qoltutmaq içün olarnı bedava davet ete. Bunı Krım-SOS cuma künü, dekabr 5-te, bildire.
Berilgen malümatqa köre, programmada yırcınıñ beş yıllıq tecribesinden eñ güzel yırları olacaq.
«Niayet, men adamlar oynacaq bir meydanda yırlaycam, çünki oturğıçlardan bezdim! Bizler seyircilernen beraber muzıkalı seyaatqa yol alıp, er bir albomda toqtalacaqmız. Menim sevimli taqımım, telli taqım, zemaneviy elektron bitler, ve oyuncılar bile olacaq! Ve sürprizlerni bozmaycam, bazıları olarğa sevimli yırlarına kibi quvanacaqlar», – dedi Jamala.
Teşkilâtçılarnıñ bildirgenine köre, kontsert çerçivesinde hayriye mezat keçirile: 50 mahsus VIP yerler biletlerinen beraber yırcınıñ imzası ile diskler olacaq. Toplanılğan para işğalci akimiyet ile razı olmayıp, köçip kelmege mecbur qalğan adamlarnıñ balalarına berilecek.
Krım-SOS malümatına köre, Qırım ve Ukraina şarqından köçip kelgenler teşkilât saytında qayd etilip, bedava biletlerni elde ete bileler.
Jamala – milleti qırımtatarı olğan ukrain yırcısı, onıñ muzıkası caz, soul, elektron ve halq muzıkasınıñ birikmesidir. Yaqında Jamala ukrain rejissöri Oles Saninniñ «Povodır» filminde baş qaraman rolüni oynadı.
