Link açıqlığı

Aluştada Qırımtatar medeniy merkezi binasız qala bile


Aluştada yerli akimiyet qırımtatar medeniyetiniñ ğayrıdan yaşartuvı ile oğraşqan Afuz Şahmurat adına AKNKO «Çaır-Dağ» yolbaşçılığını binağa kira añlaşmanı lâğu etmek mecbur eteler.

Bunı Qırım.Aqiqat saytına teşkilâtnıñ idare reisi Setya Kazakov bildirdi.

«Biz 1944 senesinden başlap, 20 yıl devamında milliy medeniyetniñ yaşartuvı ile oğraşamız. Amma şimdi işbu kira sebebinden fena alğa qaldıq. Meni şeer icraiy komitetke çağırıp, teşkilâtımız añlaşmanı lâğu etmek kerek olğanını bildirdiler, bundan soñ biz yañı yarıştа iştirak etecekmiz eken. Men bu vaqıt devamında bina tamirinе 200 biñ grivna masraf etilgenini añlattım. Bizge bu aqçanı nasıl qaуtaracqlar dep soradım, çünki bizde bütün vesiqalar ve izinler elimizde bardır», – dedi Kazakov.

Onıñ aytqanı kibi, kira añlaşması 2013 senesi soñuna yetti, amma taraflardan iç biri itiraz bildirmegeni sebebinden ve buña Rusiye ve Ukraina qanunları ceetinden mania olmağanı içün añlaşma müddeti uzatıldı.

Şeer icra komitetinde kira boyunca qoşma añlaşmanıñ olmasını talap eteler.

«Şimdi ögümizde teşkilâtımızınıñ ğayrıdan qayd etilmesi aqqında mesele tura, amma bunı etsek, bina aqqımızdan marum qala bilecekmiz», – dedi Kazakov.

Şimdi teşkilât binasız qalmamaq içün Rusiye qanunlarında özüne eñ kelişken qayd etüv şeklini qıdıra.

«Bizde folklor mektebimiz bar, mında tahminen 40 bala qatnay, yuridik mesleatlar keçirile. Şunıñ içün şimdi binasız qalmağa mümkün degil. Evelleri bu bina içün beş yıl devamında memurlar ile tartıştıq. Eger de vaqtında qayd etilmesek, binanı bizden, şübesiz, tutıp alırlar», – dey Kazakov.

Onıñ aytqanı kibi, medeniy merkez Aluştanıñ Mirnıy qasabasındaki çoq qatlı binanıñ mağaz odasında yerleşe. Mirnıy qasabası– qırımtatarlarnıñ toplu yaşağan yeridir.

Afuz Şahmurat adına AKNKO «Çaır-Dağ» qırımtatar milliy-medeniy cemiyeti 1994 senesi qırımtatarlarnıñ milliy adetleriniñ, tuvğan tiliniñ yaşartuvı ve gençlerniñ terbiye etilmesi maqsadı ile meydanğa ketirildi.

XS
SM
MD
LG