Qırımtatar halqınıñ aqları qoruvı boyunca Komitetiniñ «acele bağı»na 18 yaşında olğan qırımtatar qızınıñ ğayıp oluvı aqqında haber keldi.
Bunı Qırım.Aqiqatqa Komitetniñ başı Eskender Bariyev bildirdi.
Onıñ aytqanı kibi, qız Aqmescitniñ Kiyev rayonında yaşay edi.
«Saba, dekabr 2 künü, qız evden universitetke çıqtı. Amma saat 9-da onıñ ile bağ ğayıp oldı, şimdi bulunuv yeri belgisizdir», – dey Bariyev.
Şimdi komitette elde etilgen malümatnı ögreneler, qıznıñ tuvğan ve yaqınları ile subetleşeler. Daa da tafsilâtlı malümatnı birazdan soñ bermege vade eteler.
Teşkilâtta, ahlâqiy noqtaiy-nazardan qıznıñ ad ve soyadını aşkâr etmeyler, çünki buña ana-babasınıñ razılığı daa yoqtır.
Bu, Qırımda insanlarnıñ ğayıp oluvı ile bağlı birinci adise degil. Ukraina Milliy havsızlıq ve mudaafa hızmetiniñ malümatına köre, Qırımda işğal vaqtından 21 qırımtatarı ğayıp oldı.
Qırım «Nazirler şurası» yanında ğayıp olğan qırımtatarlarnıñ işleri ile oğraşacaq taqım peyda oldı. Taqımnıñ birinci toplaşuvı endi keçti, neticede işbu insanlarnıñ işleri Qırım boyunca Rusiye Taqiqat komitetiniñ Baş taqiqat idaresininiñ Emieytli işlerniñ taqiqatı boyunca İdaresine berildi.
Qırımda insan aqları bozuluvınıñ qayd etilmesi boyunca gece-kündüz açıq olğan telefon yolağı peyda oldı. Bu alğa rastkelgen er kes mahsus telefon nomeraları boyunca bağlana bileler. «Acele bağ»nı qırımtatar halqınıñ aqları qoruvı boyunca Komitet teşkil etti.
