Link açıqlığı

Matbuat vastaları: politsiya hadimi qırımlını dögdi


30 yaşında olğanı qırımlı İlyas Abiyev uquq qoruycınıñ tarafından zarar körgeni aqqında bildire. Erkekniñ burnu sınıq, bunıñ ile miy sarsuvı de qayd etilgen. Bu aqta ATR telekanalınıñ levhasında aytıla.

İlyas Abiyev köy meyhanesinde raatlana edi. Tışarı çıqıp, bir mevzuda davalaşqan insanlarnı kördi, olarnıñ arasında işbu meyhanede raatlanğan politsiya hadimi Anton Verhovodov öz zenaatdaşları ile edi.

Abiyeveniñ aytqanı kibi, onıñ ve bu hadim arasında sözlü dava yüz berdi, soñra olar kendi kompaniyalarına qayttılar. Amma birazdan Abiyevni politsiya hadimlerinden biri tışarı çağırdı.

«Verhovodov Anton, bölügimizdeki politsiya hızmetçisi, iç bir şey aytmayıp, türtip urdı, soñra ne olğanını endi aytıp olamayım», – dep tarif ete İlyas.

Bunı tışarıda olğan videonezaret kameraları çıqarğanlar. Şaatlar erkekni eki insan döggeni aqqında bildireler.

Abiyev aytqanı kibi, politsiyanıñ çağıruvına işbu şahıslar emiyet bermediler. İlyasnıñ dostları onı hastahanege ketirdiler, mında vaqianı ögrenmek içün politsiya hadimleri keldi.

Şimdi bu iş boyunca Taqiqat komiteti teşkerüvni keçire ve dögüş vaqtında politsiya hızmetçisi vazifelerni eda etmek kerek edimi kibi meseleler ögrenile.

Telekanalnıñ malümatına köre, işbu politsiya hadimi çalışmağa devam ete, amma yüz bergen vaqia boyunca izaatlarını bermege razı olmadı.

XS
SM
MD
LG