Türkiye Çetel işler naziri Mevlüt Çavuşoğlu qırım buhranınıñ çezilmesi daima yarımadada qalğan qırımtatarlarnıñ vaziyetini nezaret etmek kerek olğan ОBSEniñ müimi meseleleri arasında olmasını istey.
Bunı o ОBSE memleket-azalarınıñ çetel işler nazirleriniñ dekabr 4 künü Bazelde (İsveçre) keçirilgen toplaşuvda belgiledi, dep haber ete Ukraina prezidentiniñ yanında qırımtatarlarnıñ mesеleleri boyunсa vekâletli Mustafa Cemilevniñ matbuat hızmeti bildire.
Matbuat hızmetiniñ malümatına köre, Mevlüt Çavuşoğlu Türkiye Qırımnıñ qanunsız işğalini tanımağanını ve bunı etmek mümkün olmağanını bilddirdi.
«Türkiye yarımdada yaşağan qırımtatarlar vaziyetiniñ ОBSE tarafından nezaretini zaruriy bir şey olaraq tanıy», – dep añlata onıñ sözlerini Cemilevniñ matbuat hızmeti.
Teşkilâtnıñ uquq qoruyıcıları yarımada işğalinden soñ qırımtatarlarğa etilgen basım aqqında bildirgen edi. Evel Ukraina çetjl işler nazirligi qırımtatarlar ile yüz bergen vaziyetni sürgünlik kibi adladı.
2014 senesi fevralniñ soñunda, martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
